مش هموت

مش هموت من غيرك ولا هعيش بيك

مش هموت بسببك ولا هعيش على املك

مش عاوزنى مايفرقش مش كل الناس عايزانى

مين اللى عايزنى؟ مش مهم

مش هموت لو ماعازونيش ولا هعيش لو عازونى

المهم انا عايزه مين

لا مش مهم انا عايزه مين

ماهو مش مهم لأنى كدا كدا هموت

بس مش هموت من غيرك و لا هعيش بيك

هموت للأنى لازم اموت

فوبيا

طبعا كلنا عارفين ايه هيا الفوبيا. انا مش خبيرة نفسيه بس هيا باختصار الخوف من حاجات خوف شديد و ممكن تكون الحاجات ديه مش مخيفه اطلاقا بالنسبه لشخص تانى بس بتبقى مخيفه جدا للشخص اللى عنده الفوبيا. و فى ناس عندها فوبيا من حاجات غريبه جداااا زي مثلا انا لسه متفرجه على برنامج د.فيل و البرنامج كان بيكلم عن الفوبيا و جايب ناس عندها فوبيا من حاجات غريبه.

واحده مثلا كان عندها فوبيا القطن لو شافت اى قطن تخاف جدا و ترتبك

وواحده تانيه عندها فوبيا من الورق الصغير المتقطع و خصوصا المرمى على الأرض و علشان كده عمرها مابتدخل اى تواليت فى اى مكان علشان ممكن تدخل و تشوف ورق المناديل مرميه على الأرض

وواحده عندها فوبيا من الخروج تخيلوا مبتخرجش من بيتها خالص و حتى لما يجلها البريد بتاعها بتخاف تجيبه من جنينه الفيلا

و مخليا جوزها يقعد فى البيت معاها و ميروحش الشغل علشان هيا على طول خايفه و عاوزاه جمبها و حتى من كتر الفوبيا اللى عندها مقدرتش تحضر البرنامج و بعتى شريط فيديو لدكتور فيل عن حالتها ديه

وديه كانت اغرب حالات سمعت عنها بالنسبه للفوبيا

لكن فى حاجات مشهورا للفوبيا زى مثلا فوبيا الأماكن المرتفعه والأماكن المظلمه واللى بيخاف من ركوب الطيارات واللى بيخاف من العناكب وحاجات كتيره اوى

وفى ناس كتيره مبتبقاش عارفه ان عندها فوبيا

و انا من الناس الى عندها فوبيا و كل شويا اكتشف انى عندى فوبيا من حاجه معينه واولها الحشرات

اى حاجه اكبر من النمله الصغيره مش النمله الكبيره بترعب منها و خصوصااا الصراصير

هاتولى تعبان او عقربه هيبقا اهون عليا شوية من الصرصار

انا بعتبره اعفن حشره على سطح الكره الأرضيه

وفى مواقف معايا كتيره معاه و يارب متكررش

انا بجد مش بقرف منه بس لأ انا بخاف منه فعلا ممكن ناس كتيره تقولى ليه هوا هيعوضك زى ماقولة بابا الشهيره.معرفش انا سبحان الله بخاف منه و خلاص لكن فى ناس بتعتبر ان ده دلع لكن و الله ماهوا دلع و نفسى افهم الناس و خصوصا بابا كده .انا عارفه ان هو ساعات بيبقى عنده حق لأن ساعات ردود افعالى بتبقى عاليه و جامده شويه مثلا ممكن لو شوفت صرصار كده و لا كده ممكن تلاقينى بتنطط واصوت واجرى و ابقى هابله على الاخر بس و الله غصب ان عنى و ياريت الواحد لما يعرف ان الواحد عنده فوبيا من حاجه ميفضلش يرعبه بيها

لان ده بيزودها زى مادكتور فيل كان بيقول و محدش يستخف بيها.و معلش انا عارفه انى قرفتكم من مواضيع الصراصير ديه بس خلاص مش هكلم عليها تانى لحسن على رأى المثل (اللى بيخاف من صرصار بيطلعله)و ربنا يكفينا شر الصراصير..