خوف

كل يوم جديد بصحى فيه من النوم بحمد ربنا انى لسه عايشه مامتش

خايفه!ايوه

من ايه

حاجات كتره
خايفه انى اندم

انا اتسرقت يا جدعان

انا جيت اعمل نيو بوست ملقيتش الايقونات بتاعه حجم الفونت او تلوينه او تظبط شكل الكلام معرفش راح فين انا كنت سيباهم من البوست اللى قبل اللى فات و من البوست اللى فات ملقتهمش.وبعد كده انا مش عارفه اكتب حاجه بالشكل ده لو حد عارف ايه حصل يقولى و الثواب عند الله.وربنا ميبوزلهوش حاجه عنده فى البلوج ان شاء الله

تـــــــــــــــــــــــــــــــــــــــــــاج الجزيره

انا بقالى فتره مكتبتش حاجه لشويه اسباب. لكن لما لقيت التاج وصلى من سحر قولت لازم ارد طبعا و انسى اى حاجه انا فيها و اكتب
ندخل فى الموضوع علشان مطولش عليكوا و ردا على اسئله التاج وفتحت الجلسه بم بم بم هدوء من فضلكم علشان اركز و أرد على الاسئله

هل انت راضى عن المدونه شكلا و موضوعا؟
شكلا ايوه انا مرتاحه فى الالوان مثلا لكن كان نفسى تبقى احسن و اظبطها و اضيف ليها حاجات بس الصراحه انا مش عارفه لانى لسه مش فاهمه فى البلوجات اوى اما موضوعا انا مكتبتش كتير اوى بس اللى كتبته كان من قلبى انا اهم حاجه اطلع اللى فى قلبى بأى صيغه يعنى من الاخر اقدر اقول انها شغاله

هل تعلم اسرتك الصغيره بامر مدونتك؟

لا و لا الكبيره كمان انا مش معرفه حد منهم


هل تجد حرجا من ان تخبر صديقا عن مدونتك؟

االموضوع مش موضوع حرج بس فى منهم مش مهتم و كمان انا بعتبر المدونه حاجه خاصه ابعبع فيها براحتى (حلوه ابعبع ديه) بس انا معرفه اصدقاء قليلين جدا ليهم فى الليله ديه

هل تسببت المدونات بتغير ايجابى لافكارك ؟اعطنى مثال فى حاله الاجابه بنعم

فى بعض من المدونات اثرت فى تفكيرى زى مدونه تمر حنا بحب فيها انها بتكلم براحتها و باسلوب بسيط وعنيف احيانا انا بحب كدا اللى ميزوقش الكلام

هل تكتفى بفتح صفحات من يعقبون بردود فى مدونتك ام تسعى لاكتشاف المزيد؟

.انا بفتح صفحات اللى بيعقبوا عندى و منهم بفتح على بلوجات تانيه وهكذا وهكذا

ماذا يعنى لك عدد الزوار..هل تهتم بوضعه

لما بيزيد عدد الزوار اكيد ببقى سعيده لكن لو مجليش كتير مش هضايق اوى لانى انا كنت عامله المدونه فى الاساس ليا علشان افضفض مع نفسى شويه

هل حاولت تخيل شكل اصدقائك المدونين؟

ساعات بتخيل شكل بعض المدونين اللى بحب اقرالهم بس مش عارفه بيطلع صح ولا لأ

هل تشعر ان مجتمع التدوين مجتمع منفصل عن العام المحيط بيك ام متفاعل مع احداثه؟

لا طبعا متفاعل جدا مع الاحدات انا اول ما عرفت البلوجات عرفتها لانى كنت بعرف احداث كتيره من خلالها عن اللى بيحصل حوليه بدون اى رقابه فاكيد هيبقى صادق

هل ترى فائده حقيقيه للتدوين؟

طبعا اولا انى بفضفض او ببعبع زى ما قلت فوق مع نفسى .وغير كدا طبعا الواحد بيتعرف على افكار و ادمفه مختلفه

هل يزعجك وجود نقد بمدونتك ام تشعر انه ظاهره صحيه؟

لا ميزعجنيش طبعا ما دام نقد بناء وبطريقه مؤدبه مش بقيله ذوق يعنى وحكايه ظاهره صحيه ديه والله اول مره اعرف انه اثبتت الدراسات انه ليه ظاهره صحيه فى التدوين لو كنت اعرف كده كنت دونت من زمان اصلى بعيد عنكم عندى الضغط

هل تخاف من بعض المدونات السياسيه وتتحاشاها؟وهل صدمك اعتقال بعض المدونين؟

عاوزين الصراحه ولا بنت اختها ولا معرفش بيقولوا ايه المهم حد من قرايبها.انا فى الاول كنت ساعات ببقى متردده و خايفه خصوصا بعد معرفت موضوع الاعتقال للمدونين بس دلوقتى لما بلاقى بلوج سياسى كويس بعلق عليه لانى بحس انى عاوزه اكلم و اقول رائيى وربنا يتولانا .وصدمنى اعتقال بعض المدونين لانى فى البدايه مكنتش اعرف ان التدوينات مؤثره كدالكن دلوقتى الواحد مبقاش يتصدم من اى حاجه

هل فكرت فى مصير مدونتك فى حال و فاتك؟

لأ مفكرتش بس اكيد هتتقفل او ممكن اكتبها فى الميراث بدل ما مفيش حاجه تتكتب فيه يبقى البلوج و القطه

مين اكتر مدونين اثروا فيك و ليه؟

فى كتير وانا قولت فوق ان تمر حنا من ضمنهم و احمد شقير والاميره اوسا وفى كتــــــــــــير اوى غرهم

مين من المدونين بتحس انه يشبهك؟

والله مش عارفه انا حسا ان لكل واحد شكل و لون مختلف

اكتب اسماء خمس مدونين ليقوموا بهذا الاستقصاء بعدك

فانتازيا

من القلب

محمد مفيد

صحصح معايا

حاجات ليا لوحدى