دورت وشها لما حست انه ممكن يقرا حاجات كتيرة مش عايزاه يقراها ،لازم تبقى قويه، مش عليه بس لا وعلى نفسها قبله،ليه مش عارفة ممكن علشان هيا عارفة

جرأه ولا قلة ادب

متهيألى ان فى ناس كتير مبقتش تفرق بين الأتنين دول.وناس كتير ساعات بتعتبر ان قلة الأدب دية شجاعة وجرأة.وفى سلوكيات كتيرة فى حياتنا اتشقلبت.مثلا لما واحدة المفروض انها انثى دا المفروض تفضل تزعق و تبقى مشاغبة او قاعدة فى كافيه وضحكتها جايبة اخر المكان والمصيبة انها ممكن تكون بتحكى حاجات خصوصيه جدا وصوتها عالى والكافيه كله سامع الحكاية وممكن ناس تطلب انها تعيد اخر كوبليه وماسكة السيجارة بأيد وتشوح بالأيد التانية.أو واحدة تدخل زى الطور الهايج فى اى حد وميهمهاش حد الناس بيعتبرها الناس جريئة ومش بس كدة لأ كمان بيعتبروها بنت بستين راجل مع ان دية قلة ادب مش جرأه.ايوة ممكن ساعات الواحدة تبقى فى موقف ممكن تزعق فيه بس لو فيه ضرورة لكده فعلا مش فى الراحه والجايه صوتها عالى .
ولما واحد يدخل فى حاجات متخصوهوش وصوته عالى دايما علشان هوا راجل والراجل بالنسباله احبال صوتيه .وتلاقيه عمال يحكى ازاى هو دايس فى كل حاجة وعمل كل حاجة وضرب نصف شباب البلد وعرف كل بنات البلد وإزاى قدر يشتغل تلت تربع اللى عارفهم وإزاى عمل مقالب ومواقف فى ناس وضحك على ناس وعيط ناس.وفى الأخر الأقى ناس بتقول بس فلان دة ما شاء الله جريىء وشاب دايس ومصحصح للحياة.ويكون واحد زى ده هو فتى احلام واحدة.وتتباهى بيه انه واد مخلص وجرىء.
مش معقول الناس مبقتش تقدر تفصل بين الجرأة وقلة الأدب
الجرأة ديه الواحد كان عارف تعريفها ان لما الواحد ميسكتش على اى باطل ويدخل علشان يوقف الباطل وجرىء على اى حاجة تخص حقة او بلدة دية الجرأة اللى اعرفها
اما قلة الأدب فده شىء ميتعرفش لانة المفروض الواحد عارف الصح من الغلط وعارف امتى اللى بيعمله ده قلة أدب. المفروض..

جبانه

صعب أفهمنى. صعب أحسنى.صعب أسمعنى.صعب أشوفنى
زمان كنت بخاف من انى مفهمش حد. دلوقتى فاهمه الكل ما عدا انا .بخاف اقرب منى مع انى كتير بحاول لكن برجع بسرعه وأخاف من انى افهم نفسى
بكره تقييد نفسى بنفسى.بكره الحدود اللى بحطها مع نفسى لنفسى.جبانه.

معاً نحو غداً افضل بدون تفافه

بجد نفسى اعرف ليه معظم الرجاله مبيعملوش حاجه وهما بيمشوا فى الشارع غير انهم بيتفوا سورى على الكلمه. بس بجد الواحد خلاص جاب اخره امشى فى الشارع الشارع متغرق اركب المواصلات الاقى الراجل نازل ارف طول ما هوا ماشى كأن العربيه مش بتمشى بالبنزين بتمشى بالتفافه وياريت بيكتفوا بالتف وبس الكل عارف التوابع . طب يا جماعه اوك براحتكوا بس الله يكرمكم مش عال الصبح كده.مش كفايه اللى واحد شايفه كل صبح من زحمه وقرف مواصلات وكل يوم والتانى معرفش مين معدى ويوقفلنا الدنيا .ولا لما نعدى على موقف العربيات اللى جمب السكه الحديد فى رمسيس قصدى اللى كان موقف وعمالين يهدوه لما جابوه الارض الواحد كل يوم بيتحرق دمه من المنظر ده.من كتر الفلوس بيبنوا و يهدوا.طب اتبنى من الاول ليه لما هوا مخالف ولا فاجاه كده اكتشفه ان مكانه غلط كانه معمول ب2 جنيه عادى ده غلط طب هدوه.فين الدراسات اللى اتعملت قبل ما يبنوه . يبقى الواحد مش ناقص يا جماعه تف بقى ولا علشان الصوره تكمل.محدش يزعل من الرجاله انا مقلتش كلهم بس المعظم بصراحه.

بقالى فتره طويله كنت عاوزه اكتب لكن كل ما أجى اكتب ارجع فى كلامى واقول هكتب ايه هكتب نكد وانكد على نفسى وعلى الناس. استنى اى خبر حلو او اى حاجه كويسه اكتبها لكن للاسف كل يوم الهم والقرف بيزيدوا فقلت لو استنيت يبقى كده مش هكتب خالص. فى فتره مش حبه اتكلم عنها بس كل حاجه عدت وبسرعه جدا والحمد لله.مش عارفه ليه حاسه انى بقيت ضد الصدمات اه والله جتتى نحست ولا ايه مش عارفه بس حاسه انى بقيت قويه وجامده ليه مش عارفه .ساعات ده بيبقى كويس لكن ساعات كتير لاْ. لان الاحساس بالاْلم والوجع شىْ طبيعى بعد اى موقف صعب الواحد بيتعرضله.لكن اللامبالاه ديه شىْ غريب انا نفسى مستغرب نفسى ايه كميه الامبالاه اللى نزله عليه ديه معقوله بالسرعه ديه رجعت طبيعيه اكيد ساعات بضايق بس مش الضيق اللى اى حد طبيعى فى مكانى هيضايق قده.
والحمد لله اشتغلت بقالى حدود شهرين وفعلا الشغل جه فى وقته بدل قعدت البيت والتفكير اللى كان هيخلى الواحد يضرب والحمد لله اتعرفت على ناس كويسه اوى وقربت من ناس فى فتره صغيره اوى وديه الحسنه الوحيده اللى حصلتلى فى الفتره اللى فاتت واليوم اللى باخد فيه اجازه ببقى مضايقه وعاوزه انزل فيه الشغل مش علشان الشغل بس علشان اشوف صحابى هناك.لكن اجازه العيد قلت اكيد مش هزهق فيها اكيد زى كل سنه هقضيها مع قرايبى اللى فى سنى و قاريبى المقربين ليا لكن للاسف افتكرت ان حاجات كتير اوى اتغيرت الفتره اللى فاتت وفعلا العيد مكنش عيد
اول يوم العيد:صحيت على فيديو صدام وهوا بيتعدم استغفر الله العظيم اول حاجه على الصبح كده .طب شكرا ى كل سنه وانتم طيبين وعلى خروف العيد اللى كانوا بيضحوا بيه انا اسفه طبعا للتعبير بس ديه كانت الرساله اللى الكل سامعها وشايفها بتتقلوا قداموا كل سنه و انتوا طيبين يا مسلمين واجدع تحيه من امريكا لكل مسلم واحلى عديه على الصبح.وكل واحد استلم العديه وهوا حاتت .... فى بقه .اوك معلش شويه والعيله تتجمع و افك وانسى اللى شفته على الريق ده.بس للاسف اللمه بتاعت كل سنه محصلتش قليل اللى جم كل واحد مشغول و مهموم حتى المشاكل فى العيد
تانى يوم: زى اليوم الاولانى مفيش تجديد هطق خلاص
لكن اليوم التالت والرابع حصل تجديد خرجت لكن للاسف رحت اعزى فى جارتنا ووالده صحابى وطبعا مش هقلكم عدوا اليومين دول الذاى وده كان العيد معايا .لكن اللى انا مستغرباه ان ناس كتير برده قضوا العيد ده فى نكد برده من المشاكل سواء مشاكل شخصيه اوالمشاكل اللى حوالينا ومشاكل البلد محدش ليه نفس يعيد او يكون فيه فرحه

يارب

بقالى كتير محسيتش الشعور ده محستهوش غير مره واحده بس وخايفه يكون احساس غلط مع انى عارفه الاحساس ده كويس.بس خايفه خايفه لحسن....وساعتها مش هقدر يا ريتنى اقدر اعرف لكن للاسف علشان اعرف....يارب اعرف من غير اى .... يارب